Talk to your gjyshi gjyshja Dua Lipa nëna babi familja
in Albanian

Përmes kësaj tematike nxënësi zbulon gradualisht dhe natyrshëm pjesën më të qenësishme të identitetit të vet, gjuhën shqipe me veçoritë e saj, zotërimi i së cilës e aftëson atë që të punojë me tekste letrare dhe jo letrare. Të gjitha fushat/lëndët e tjera formësojnë dhe plotësojnë më tej tek nxënësi, në mënyrë më të plotë, kuptimin e identitetit kombëtar shqiptar.

Përmes kësaj tematike nxënësi njihet me koordinatat dhe me hartën e vendosjes hapësinore të shqiptarëve, si dhe me momentet kryesore të historisë së tyre përgjatë shekujve. Kjo tematikë aftëson nxënësin që të orientohet në mënyrë graduale, duke zotëruar të dhënat kryesore që lidhen me gjeografinë, historinë dhe kulturën shqiptare, me popullin shqiptar si formacion etnik dhe si njësi kombëtare.

Përmes kësaj tematike nxënësi arrin të bashkërendojë të dhënat dhe njohuritë e domosdoshme mbi të cilat është ndërtuar shoqëria shqiptare që në kohën e ilirëve. Aty janë bashkërenditur historia, arti, muzika, zakonet dhe traditat, trashëgimia materiale e kulturore, monumentet e kulturës, parqet natyrore, vendet turistike etj.

Përmes kësaj tematike nxënësi përdor njohuritë e marra për kulturën dhe historinë shqiptare, duke integruar dhe duke e parë Shqipërinë dhe shqiptarët si gjithë historitë dhe kulturat në botë.

Përmes kësaj tematike nxënësi njihet më thellë me mësimin, shkollën, punën, lojën, kohën e lirë në Atdhe dhe i krahason me ato të vendit ku jeton e krijon, duke u përgatitur për një përfshirje më kompetente të vetes në ndërtimin dhe zhvillimin e këtyre veprimtarive. Në këtë mënyrë ai ndërtohet më tej në rrafsh kulturor dhe e stabilizon baraspeshën e duhur identitare. Gjithashtu, kjo tematikë krijon mundësi që nxënësi të pasurojë fjalorin me fjalë dhe terma që lidhen me mësimin, punën, lojën dhe kohën e lirë.